DAVAO CITY – Nagpahimangno ang ahensiya sa Department of Health (DOH) 11 ngadto sa publiko nga likayan ang paghumol sa tubig ilabi na kung adunay kusog nga pagbaha aron nga makalikay sa sakit nga leptospirosis.
Tipik lamang ang pahimangno sa ahensiya human nga usa ka pulis ang namatay gumikan sa nahisgutan nga balatian.
Wala na natabang pa sa mga doktor ang biktima nga si Police Corporal Rey John Villahermosa, 32 anyos, residente sa Calinan ning dakbayan ug nadestino sa Tugbok PNP human nga migrabe ang iyang kondisyon tungod sa leptospirosis.
Sa inisyal nga imbestigasyon, na-admit ang nahisgutan sa Robillo Hospital sa Calinan apan gibalhin kini sa Southern Philippines Medical Center (SPMC) human nga nalisdan kini ug ginhawa.
Apan niining milabay nga adlaw hingpit na kini nga nakutloan sa iyang kinabuhi.
Kahinumduman nga makuha ang sakit sa leptospirosis sa tubig baha nga adunay ihi sa ilaga ug mamahimong mosubay ang bacteria sa mga samad.
