DAVAO CITY – Kumpirmado sumala pa nga usa ka delegado sa Private Schools Athletic Association (Prisaa) ang namatay gumikan sa cardiac arrest niining milabay nga adlaw. Subay sa inisyal nga report sa Talomo Police Station, ang 53 anyos nga beach volleyball coach sa Region 3 nga si Pedrito Salonga, Jr. ang nadiskobrehan nga wala nay kinabuhi sulod sa billeting headquarters sa Maa National High School ning dakbayan sa bandang alas kuwatro sa kaadlawon.
Sumala sa igsuon sa coach nga si Dino Salonga, gipukaw niya ang biktima apan wala kini mibangon hinungdan nga dali silang mitawag ug medical assistance. Dali nga gidala ang nahisgutan sa Southern Philippines Medical Center (SPMC) apan gideklara kining dead on arrival sa mga doktor.
Sumala sa attending physician niini, ang hinungdan sa kamatayon sa coach mao cardiac arrest.
Sa kasamtangan, gipahimutang ang patay’ng lawas sa biktima sa SPMC ug ipailalom kini sa autopsy.
Gipasalig sab ni City Health Office (CHO) head Josephine Villafuerte gi-andam na sa siyudad ang gikinahanglan nga assistance kang Pedrito, kalakip na ang pagbiyahe sa patay’ng lawas niini sa iyang lugar sa Angeles, Pampanga City.
Una ng mihangyo ni National Prisaa president Ma. Lita Montalban ngadto kang Davao City Mayor Sara Duterte-Carpio nga tabangan sila sa gidangatan sa coach. Sa kasamtangan wala pa nagpagula ug official statement sa maong insidente ang kadumalahan sa Prisaa.
