DAVAO CITY – Malikayan sumala pa ang mga pagpanikas sa adlaw sa eleksiyon karong Mayo 13 ning tuig kasamtangan ilabi na dinhi sa dakbayan sa Davao kini gumikan kay usa ang siyudad sa mga pilot areas sa nasod nga mogamit ug Voter Registration Verification Machine (VRVM).
Nasayran sa Commission on Election (Comelec), nga dakong tabang ang VRVM nga susama lamang kadako sa usa ka tablet gumikan kay aduna kini katakos nga ma-scan ang finger print sa usa ka botante sa matag presinto aron masayran kung lihitimo kini nga botante.
Makatabang sab sumala kini aron nga mawagtang ang kabalaka sa katawhan nga makabotar pa kadtong mga pangalan sa mga mipanaw na nga indibidwal.
Gikanayon sab ni Atty. Krisna Caballero, tigpamaba sa Comelec 11 nga gawas sa dakbayan sa Davao kalakip sab sa launching sa VRVM ang lalawigan sa Davao del Sur.
Samtang kung dili sumala pa mo-scan ang finger print sa botante sa VRVM, magpahigayon sila ug manual search sa pangalan niini.
Kung magmalampuson ang paggamit ug VRVM, posibleng gamiton na matud pa kini matag panahon sa eleksiyon.
