DAVAO CITY – Nanawagan ang kasundalohan sa mga hingtungdan nga ahensiya sa kagamhanan nga mahatagan gilayon ug hinabang ang Sitio Tapayanon nga nahimutang sa mga boundary sa Agusan del Sur, Davao del Norte ug Bukidnon.
Nasayran nga tungod sa kalayo sa lugar, bugtong gobyerno sa rebeldeng NPA lamang ang nailhan sa mga residente hinungdan nga dihang malampuson kini nga nasulod sa kasundalohan, ubay-ubay ka mga sakop sa NPA ang mibalik sa sabakan sa kagamhanan.
Nasayran nga pito ka adlaw nga gibaktas sa mga kasundalohan ang lugar ayha nila kini nga nasulod.
Gitataw sab ni Lt. Amadeuz Vincent John Celestial, CMO officer sa 60th infantry battalion philippine army nga tungod sa kalayo sa lugar, sila pa ang pinaka-unang government unit nga nakasulod sa lugar.
Gikanayong anaa sa 500 ang mga nanimuyo sa lugar diin sagad niini mga miyembro sa Ata manobo.
Samtang gibutyag ni Capt. Jerry Lamosao, tigpamaba sa 10th ID philippine army, nga ila gilayon nga ipadangat sa mga ahensiya sa kagamhanan ang maong sitwasyon aron nga matabangan ang mga residente sa lugar.
