DAVAO CITY – Pormal na nga napasaka ang kasong homicide ngadto sa Provincial Prosecutors Office sa dakbayan sa Digos batok ngadto sa usa ka dese sais anyos nga mao ang gitudlo nga responsible sa pagpatay sa usa ka kwatro anyos nga bata sa Barangay Kapatagan, Matanao, Davao del Sur.
Ang suspetsadong menor de edad nga gipasaka-an ug kaso mao ang usa ka Rene Boy Alcano, Jr., 16 anyos, usa ka special child, residente sa Sitio Buliton, Barangay Kapatagan, Matanao, Davao del Sur.
Gipasaka ang kaso human nga mi-angkon ang suspek nga siya ang mihimo sa krimin pinaagi sa extra judicial confession human nga iyang napatay ang kwatro anyos nga bata alas 11:00 sa buntag niadtong Hulyo 24, tuig kasamtangan.
Pinasikad sa gisumete nga affidavit nasayran nga ang nahisgutan nga biktima kuyog sa suspek sa sapa nga bahin, diin ang ilang dula mao ang Kabaw-Kabaw.
Atol sa maong dula gihigtan sa dese sais anyos ang liog sa kwatro anyos nga bata gamit ang lanot gikan sa palwa sa saging nga laya.
Sa dihang gipakamang-kamang niya ang bata isip kabaw sa pagbira pa niya sa pisi-pisi mihugot kini sa liog sa kwatro anyos nga naglisod na sa pagginhawa.
Gumikan kay special child, gibira pa gayud niini ang pisi-pisi aron unta nga mabugto, apan misamot na hinoon sa pagtuok sa biktima nga nawad-an ug panimout.
Miuli ang suspek sa ilang balay apan wala gayud magsaba sa aksidente nga nahitabo sa ginikanan sa bata nga ila ra nga silingan ug bisan mismo sa iyang amahan ug inahan.
Mihimo ug dugang imbestigasyon ang kapolisan ug niining milabay nga adlaw ang suspek kinuyogan sa iyang amahan Rene Boy Alcano, Sr. mitahan ngadto sa mga tinugyanan sa balaod ug hingpit nga napasaka ang kaso.
