DAVAO CITY – Naduso na ang kasong multiple homicide ug frustrated homicide batok kang Joel Nonoy, amahan nga mi-masaker sa kaugalingong mga anak gumikan sa naghinobrang kasuko sa milayas nga asawa nga si Arlene Nonoy.
Mahinumduman nga gabii niadtong Augusto 2, natigayon ang ngilngig nga krimin dihang hubog nga miuli si Joel sa ilang pinoy-anak sa Purok 1, Barangay San Isidro, Babak District, IGAGOS ug gipangdunggab ang upat ka mga anak nga labihang tuloga gumikan sa sobrang kasuko sa milayas nga asawa.
Una nang naila ang mga nangamatay sa pagpanonggab nga sila si Argie, 13 anyos, Cyrus, 11 anyos, ug Aira Nichole, pito ka tuig pa lamang. Nasayran nga lima ang anak sa magti-ayon ug upat sa mga nahisgutan ang gibawi sa ilang amahan dihang nagbalatian ang inahan ni Arlene, ug si Justin lamang ang nahibilin sa poder ni Arlene ug wala madamay sa krimin.
Sumala sa IGACOS Police sa pagpanguna ni PCI Giussepe Geraldi nga nining adlawa lamang nila naduso ang kaso gumikan kay gitambalan pa sa Southern Philippines Medical Center (SPMC) ang suspek nga nagdunggab sa kaugalingon human patya sa dunggab ang iyang mga anak.
Nagpabilin pa sa SPMC ang nag-inusara nga survivor nga si Sofia Nonoy, upat ka tuig pa lamang.
Una nang mipatim-aw si Arlene ug bout nga ma-angkon ang hustisya sa mga nangamatay nga mga anak sa kamot sa naghuramintado nilang amahan, nga mao ra sab ang mibokbok ug mipasakit kaniya sa makadaghan nga higayon mao nga milayas siya ug miuli sa iyang pamilya sa dakbayan sa Panabo.
Una nang gi-angkon ni Arlene nga mga usa ka bulan na siya nga mibiya sa ilang balay sa wala pa ang krimin gumikan sa di na maagwanta nga padayon nga pagpanakit ug pagpangulata sa suspek kaniya gumikan sa naghinobra nga selos.
