DAVAO CITY – Tulo ko mga miyembro sa pamilya Pascual ang dungan nga namatay samtang usa pa ka miyembro sa pamilya ang nakasinati ug grabeng paso human nga nasunog ang ilang balay alas 4:20 ganinang kaadlawon sa NHA Subdivision, Buhangin ning dakbayan sa Davao.
Naila ang mga namatay nga mao sila Christopher ug Rose Pascual, magti-ayon ug ang ilang kinamanghurang anak nga si Camile Pascual, 12 -anyos, puros residente sa Hope Street, NHA Buhangin ning syudad.
Samtang padayon usab karon nga ginatambalan ang survivor nga si Pamela Pascual, 15-anyos. Subay sa pamahayag sa silingan nga si Earl Jamero nga maoy unang miresponde sa sunog ug ang laing duha pa ka kauban, naka kandado ang gate sa balay sa pamilya Pascual hinungdan nga nalidan usab sila nga sudlon kini.
Migamit pa sumala pa sila ug atsa aron nga gub-on ang padlock sa gate ug sa dihang nakasulod na sila, ilang nakita ang survivor nga si Pamela nga na lapnos na ang duha ka kamot ug nagpakilu-oy nga luwason ang iyang mga ginikanan ug igsoon nga anaa pa sa sulod sa ilang balay.
Wala na mikatag pa ang kalayo nga nagsugod sumala pa sa kusina nga bahin human nga nagtinabangay ang mga silingan sa biktima.
Nalisdan usab sumala pa nga makagawas ang mga biktima tungod kay naka grills ang mga bintana ug napalibutan kini sa firewall.
Gibutyag usab ni Jamero nga wala siyay background sa pag rescue sama na lamang sa sunog, iyaha lamang butong nahuna-hunaan mao ang pagtabang sa ilang silingan nga nanginahanglan.
