DAVAO CITY – Gipanghimakak sa 46TH Infantry Battalion ang akusasyon sa Karapatan-SMR nga sila ang mipaluyo sa pagpatay sa chairperson sa Hugpong sa mga Mag-uuma sa Pantukan (Humapan) nga gipusil patay kaniadtong Marso 20 sa Barangay Kingking, Pantukan, Compostela Valley.
Matud pa kang Lt. Col. Michael Licyayo, commander sa 46th IB, usa lakang ka propaganda ang nahimong alegasyon sa progresibong grupo.
Gitino sa opisyal nga marching order sa kasundalohan ang pag-assist sa rebel returnees sa mga hilit nga lugar pinaagi sa ilang community support program (CSP).
Gani, nagpahigayon na sumala pa ug imbestigasyon ang kapulisan kalabot sa maong insidente.
Una ng gibutyag sa grupong Karapatan-SMR nga giila ang gipatay nga mag-uuma nga si Agudo Quillio, 52 anyos, residente sa Purok Gemilina, Sitio Lawaan, Barangay Kingking, Pantukan, Compostela Valley.
Giila sumala pa ang nahisgutan nga aktibong supporter sa agrarian reform beneficiaries organizations sa rehiyon.
Sakop matud pa ang biktima sa Humapan usa ka municipal peasant organization sa lungsod sa Pantukan ilalom sa provincial peasant organization, Hugpong sa mga Mag-uuma sa Walog Compostela (Humawac), usa ka affiliate organization sa Kilusang Magbubukid ng Pilipinas- Southern Mindanao Region.
