DAVAO CITY – Wala na natabang pa ug nabugtoan sa iyang kinabuhi ang usaka masakiton human nga gipabuthan ug granada ang kaugalingon.
Sa inisyal nga imbestigasyon sa kapilisan alas- 12:40 sa udto sa milabay nga adlaw nahitabo ang insedente diin nahitabo sa ilang balay sa 74-A, Purok 9, Shrine Hills, Matina, Davao City.
Ang biktima nailhang si Gerry Oyan Mahinay, 56, minyo, kinsa giingong kanhi sundalo, ug naghambin sa balatian nga stage 4 lung cancer.
Subay sa spot report sa Talomo Police Station nga gituohang nag-suicide ang biktima human naghambin sa iyang balatian ug giingong gihuna-huna niini nga palas-unon na siya sa iyang pamilya.
Ang anak sa biktima nagbutyag nga niadto pa magpunay na og gunit og granada ang iyang amahan.
Suma sa report, niadtong Huwebes nag-inusara ang biktima sa iyang kuwarto mao nakahigayon sa pagpakamatay.
Taud-taod, kalit dunay mibusikad sud sa balay ug didto napalgang daghan na og dugo ug natusaktusak ang lawas sa biktima.
Ang Explosive Ordnance Disposal (EOD) sa Davao City Police Office naglisod na sa pagkakaplag sa mga tipaka sa granada sanglit napinu-pino na kini ug bugtong pin nalang ang nakaplagan.
Samtang, gipailalom na sa autopsy ang patay’ng lawas sa biktima.
