DAVAO CITY – Gisuta karon sa kapolisan sa dakbayan sa Digos sa Davao del Sur kung dunay foul-play ang kamatayon sa usa ka nurse, kinsa nakaplagan na lamang mga alas 9:00 ang takna sa kagabhi-on nga wala na’y kinabuhi.
Nagbitay ang nahisgutan nga biktima nga nakaplagan sa iyang mga kabanay sulod sa ilang balay Barangay Tres De Mayo, sa nahisgutan nga dakbayan. Giila lamang ang biktima nga usa ka Angel, 27 anyos, dunay kaipon.
Ang biktima nakit-an sa iyang pamilya nga nagbitay gikan sa sagbayan gamit ang pisi nga gihigot sa iyang liog ug sa sagbayan sa ilang balay.
Sa wala pa nakaplagang patay si Angel, nakita kini nga gikalalis ang iyang kaipon nga nailang usa ka alyas Reynold. Human niadto daw nagluya na si Angel gumikan sa depresyon.
Gipahiluna na ang patay nga lawas sa biktima sa usa ka punerarya sa dakbayan sa Digos.
