DAVAO CITY – Gipasalig sa ahensiya sa Department of Education (DepEd) Davao Region nga mas palig-onon nila ang “hygienic measures” sa ilang mga ipahigayon nga feeding programs sa mga tulonghaan human ang ulahing insidente sa 123 ka mga estudyante sa Davao Oriental nga nakasinate ug pagpanakit ug tiya human ang pagtumar ug ferrous sulfate supplement.
Matud pa kang DepEd-Davao Director Alberto Escobarte nga sa ilang inisyal nga imbestigasyon, ang nasinatian sumala pa sa mga tinun-an usa ka reaksiyon sa giinom nga bitamina apan kinahanglan sab nga subayon ang nahimong preperasyin sa arrozcaldo nga gipakaon sab sa mga estudyante ayha nila gitumar ang bitamina.
Gitataw sab sa opisyal nga dili nila ihunong ang pagpanghatag ug ferrous sulfate sa ilang mga feeding programs sa rehiyon inay gipasalig niini nga mas pakaunon una ug tarung ang tanan nga mga estudyante ayha pa-imnon niini.
Una ng gibutyag ni Davao City Health Office head Dr. Josephine Villafuerte, nga sagad adunay reaksiyon sa lawas ang ferrous sulfate ilabi na kung kulang ang kaon sa mitumar niini.
Gipasalig sab ni Escobarte nga naglusad na ug imbestigasyon ang DepEd-Davao ug Department of Health (DOH)-Davao sa maong insidente sa Davao Oriental aron nga i-assess kini ug dili na subling mahitabo sa mosunod pa nga feeding programs nga ilang ipahigayon sa rehiyon.
