DAVAO CITY – Padayon nga gihasol sa mga manlungkabay ang mga residente sa Talomo area taliwala sa gipatuman karon nga martial law.
Subay niini padayon ang paningkamot sa Talomo Police Station nga masulbad ang nahisgutan nga suliran.
Pinaka-ulahi nga nahimong biktima mao ang usa ka alyas Jeany, dese otso anyos, dalaga, residente sa Number 143, 6th Avenue, Alpha Executive Homes, Matina Aplaya, ning dakbayan sa Davao.
Sumala sa biktima nga mga alas 2:00 ang takna sa kaadlawon, samtang tulog siya sa ilang pinoy-anan kauban ang usa ka Valrey Rondalis Magno, 51 anyos, usa ka technician nga residente sa nahisgutan nga dapit.
Dihang nakamata ang nahisgutan nga biktima nabati niini ang kasikas sulod sa iyang balay, ug namatikdan nga nagpatong kaniya ang usa ka alyas Bin Laden nga nagti-on kaniya sa mahait nga kutsilyo, dala ang awhag kaniya sa paghatag sa iyang kwarta.
Gumikan sa gibati nga naghinobra nga kalisang iyang gihatag sa suspek ang kwarta nga nagkantidad ug P4,500 ka pesos.
Dali nga miikyas ang nahisgutan nga mga suspetsado. Daku ang pagtuo sa biktima nga gipanamastasan siya sa suspek samtang tulog gumikan sa gibati nga pagpanakit sa iyang kalawasan.
Nasayran nga gikuha sab sa suspek ang usa ka relo nga gipanag-iya sa usa ka Valrey Rondaris Magno nga nagkantidad ug P3,500 ka pesos.
Nasayran sa biktima nga dunay lain pang duha ka mga kauban ang suspek nga kalakip nga misulod sa iyang balay.
Dali sab hinoon nga miikyas ang mga suspek human sa nahisgutan nga tulis.
Dali sab dayon nga midangop sa Talomo Police Station ang biktima aron nga ipatala ang tulis sa iyang pinoy-anan.
Padayon ang gihimo nga pagpanubay sa Talomo Police Station aron nga mailhan ug madakpan ang mga suspek sa nahisgutan nga krimin.
