DAVAO CITY – Gikanayon ni Maning Duran, chair sa moderate Southeastern Mindanao Diversified Drivers and Operators Cooperative (SEMDDOC) nga lahi na ang karon ang pagpatuman ug Martial Law kung itandi kaniadtong panahon sa rehimen ni kanhi Pangulong Ferdinand Marcos.
Matud pa kang Duran nga kung kaniadtong mahadlok ang mga tawo kung makakita ug mga sundalo, daw normal lamang kini karong panahona.
Bugtong namatikdan lamang karon sa nahisgutan mao ang pag-minus sa dagan sa trapiko ug nagtuo ang nahisgutan nga tungod kini sa pahayag o guidelines sa Martial Law ni Mayor Sara Duterte Carpio diin kinahanglan nga magpundo na lamang sa panimalay kung walay importante nga adtuan sa siyudad ilabi na kadtong naggikan sa mga kasikbit nga dapit.
Gibutyag sab ni Duran nga normal lamang karon ang dagan sa mga Public Utility Vehicles (PUV) gawas lamang sa pagsaka sa presyo sa gasolina.
Apan ang mga namasahero ug gabii, minus na lamang matud pa ang ilang kita gumikan kay dyutay lamang ang pasahero ug posibleng hinungdan niini ang curfew nga gipatuman karong panahon sa Martial law.
Nanawagan sab si Duran ngadto sa mga driver ilabi na kadtong mga namasahero panahon sa kagabhi-on nga gilayon kini nga makig-alayon sa otoridad sa higayon nga makamatikud kini ug mga katahapan nga tawo aron gilayon kini nga maaksiyonan sa otoridad ilabi na nga daghanan sumala pa karon ang mibakwit gumikan sa kagubot sa Marawi.
