DAVAO CITY – Wala na masubay sa Eastern Mindanao Command (Eastmincom) kung kinsa ang lima ka mga kalalakin-an nga naka-itom nga mitinguha sa pagdunggo sa baybayon sa Matina Aplaya, niadtong Biernes.
Una nang gipahayag ni Lt. Gen. Rey Leonardo Guerrero, Commander sa Eastmincom nga ulahi na ayha pa na-report kanila ang kalabot sa nahisgutan nga mga dayo, ug sa dihang gi-respondihan wala na ang mga suspek.
Una nang gidayeg ni Guerrero ang mga Badjao sa Seaside 2, Matina Aplaya ning dakbayan gumikn sa kaigmat ug ka-abtik sa pagpakig-alayon sa Eastmincom.
Ang mga Badjao ang mi-sita sa mga suspek nga sakay sa motorized banca hinongdan nga napugngan ang pagsulod sa mga suspek sa dakbayan.
Una nng gitataw sab ni Police Regional Office (PRO) Eleven Director Police Chief Supt. Manuel Gaerlan nga duna na sila’y mga gikasabot nga mga barangay tanod nga mao ang una nga mo-responde sa mga sumbong labot sa seguridad sa dakbayan.
Padayon sab ang mga police auxiliary sa pagpahigayon ug foot patrol sa ilang barangay.
Sumala pa kang Gaerlan nga daku ang ikatabang sa mga sibilyan kung ika-report dayon ngadto kanila ang mga kadudahan nga mga tawo o kaha butang sa ilang palibot.
