DAVAO CITY – Midunggo dinhi sa dakbayan sa Davao ang tulo ka mga Chinese Vessel sa Chinese Navy dinhi sa dakbayan sa Davao kaganinang ala 1:00 ang takna sa hapon, niining adlawa, Abril 30 ug magpabilin hangtud sa Mayo 2, kasamtangan nga tuig.
Gilakipan kini sa Missile Guided Destroyer Chang Chun (DDG150), guided missile Frigate Jin Zhou (FFG532), ug type 903 replenishment ship Chao Hu (890) nga gilangkuban sa flotilla sa mga nagabisita nga mga barku nga gipamuno-an ni Rear Admiral Shen Hao, Deputy Commander sa East Sea Fleet sa People Liberation Army (PLA) Navy ug kasamtangan nga Commander in chief sa PLA Navy Task Group 150.
Pinaka-una kini nga nahitabo sa Mindanao gumikan kay na-andan na nga ang mga silingang nasod nga moduaw sa Pilipinas didto modunggo sa South Harbor sa Manila, apan karon sa Sasa Wharf midunggo ang nahisgutan nga mga barkong panggubat sa China.
Gidawat ang mga langyaw nga mga navy sa ilang counter part dinhi sa dakbayan sa Davao atol sa ilang pagduaw nga molungtad ug tulo ka adlaw nga pagduaw.
Gikan ang nahisgutan nga mga barku sa East China Sea.
Tumong sa ilang pagdunggo sa dakbayan sa Davao ang pagmugna ug panag-alayon, ug pagmugna sa kalig-on ug kalinaw tali sa nasod Pilipinas ug sa China isip tipik sa neighbor diplomacy.
