DAVAO CITY – Nasayran gikan kang Adol Fuertes, igsuon ni Cristituto Fuertes nga nalisdan sila sa kasamtangan gumikan kay upat na ang patay sa mga sakop sa pamilya, samtang halos susama sab nga gidaghanon ang anaa pa sa Southern Philippine Medical Center (SPMC).
Sumala pa kang Adol nga iya nang gikasabot ang iyang mga silingan nga magpuli-puli sa pagpulaw sa mga gihaya ug sa mga anaa pa sa hospital.
Naila ang mga nangamatay nga mga biktima sa sunog nga sila si Crystal Ornillo nga kalakip sa mga anaa sa kritikal nga kahimtang sa dihang nakuha gikan sa nasunog nga bala’y pamatigayon.
Unang nabugtu-an sa kinabuhi sila si Cristituto Ornillo, 3 ka tuig pa lamang, ug Cristy Ornillo, 8 ka tuig. Ang pito ka bulan nga bata nga anaa sa tagu-angkan sa iyang inahan April Joy Ornillo, 40 anyos.
Padayon pa gihapon nga gi-obserbahan ang kahimtang sa mga biktima kalakip na si Cristito Fuertes ang live-in ni April Joy.
Gisaysay sab ni Adol nga ang mga sakop sa pamilya nga anaa pa sa SPMC gipangga-id sa ilang mga katre aron nga katambalan ang ilang napaso nga mga lawas.
Sagad sa mga biktima nakahi-agum ug third degree burn. Dili pa ikahinabi ang mga biktima nga nagping-it pa gumikan sa mga nahi-aguman nga mga paso.
Pasalamat lamang ang pamilya nga mihatag na ug tabang ang kagamhanang dakbayan ug ang kapitan sa Catalunan, Grande nga si Konsehal January Duterte.
