DAVAO CITY – Gitino sa City Social Services Development Office (CSSDO) nga nagpadayon pa gihapon ang Educational Assistance sa lokal nga panggamhanan alang sa mga kabanay sa nahimong biktima sa 2003 Sasa Wharf ug Davao City old International Airport bombings.
Matud pa kang CSSDO head Maria Luisa Bermudo nga sa mga kabanay sa Sasa Wharf bombing, migahin na ang lokal nga panggamhanan ug P5 million alang sa educational assistance.
Ang nahisgutan nga tabang gigahin alang sa mga anak ug kabanay sa tanan nga mga biktima bisan nga namatay o na-angol ang mga nahisgutan sa pagpamomba.
Gitataw sab ni Bermudo nga 14 ka tuig ang milabay sukad nga nahitabo ang insidente nga mikalas ug 15 ka mga sibilyan ug nakapa-angol sa laing 46 ka mga biktima, anaa na sa 500 scholars ang gipatungha sa mga nagkadaiyang tulonghaan ug unibersidad sa siyudad.
Nasayran nga ang nahitabong pagpamomba sa old airport miresulta sa kamatayon sa 20 ka mga indibidwal.
Gitino ni Bermudo nga ang assistance magpadayon hangtud nga ang usa ka scholars buot pa nga magtuon apan kung plano sa mga nahisgutan nga magbalhin ug kurso, kinahanglan nga pahibaw-on niini ang CSSDO.
