DAVAO CITY – Asikasuhon gilayon ni Atty. Josue Jude Sabio ang abogado ang piyansa sa self confessed Davao death squad hit nga Edgar Matobato kini human nga nagpagula na ang Regional Trial Court (RTC) Branch 19 Digos City ug kamandoan nga sikupon na ang nahisgutan tungod sa kasong frustrated murder.
Tipik ang maong kaso sa reklamo sa retired adjudicator sa Department of Agrarian Reform (DAR) nga si Abeto Salcedo Jr. Salcedo diin gitudlo niini si Matobato nga maoy misulay pagpatay kaniya kaniadtong Oktubre 23, 2014.
Mi-isyu gilayon ug arrest warrant si Judge Carmelita Sarno-Davin human ang pagtestigo ni Matobato sa senado kaniadtong Setyembre 15 sa milabay nga tuig.
Apan gikanayon ni Atty. Sabio nga gisumite niya ang Witness Protection Program (WPP) certification nga nagkanayong anaa sa protective custody si Matobato sukad Setyembre 1, 2014 hangtud Mayo 4, 2016.
Andam sab sumala pa siya nga i-presenta ang akusado sa korte aron lamang pamatud-an nga inosente kini sa maong pasangil.
Kahinumduman nga kaniadtong Oktubre sa milabay nga tuig, mitahan sa national police headquarters sa Quezon City si Matobato human nga nag-isyu ug korte dinhi sa dakbayan ug warrant of arrest batok kaniya tungod sa kapakyas nga motambong sa pagdungog kalabot sa kasong illegal possession of firearms and ammunition nga gipasaka batok kaniya.
Nakagawas sa presohan ang nahisgutan human nga gitabangan ni Senator Antonio Trillanes IV, nga makapiyansa ug P30,000.
Si Matobato ang unang miduhig kang Pangulong Rodrigo Duterte sa gikanayong pagpamatay nga himuan sa mga DDS kaniadtong Mayor pa lamang kini sa siyudad.
