DAVAO CITY – Pabilin pa nga nagpag-alim sa nahi-agumang samad ang usa ka babayeng biktima nga aksidente nga naposilan sa usa ka security guard alas 5:30 kagahapon sa hapon.
Naila ang security guard nga usaka Jerec Fernal Logronio, 19 anyos, security guard ubos sa Expose Security Guard Investigation Inc., lumad sa Surigao del Sur apan temporary nga nagsaka sa Maa, ning dakbayan sa Davao.
Nasayran nga samtang anaa kini sa iyang duty sa Kabalikat Para sa Maunlad na Buhay Incorporated nga nahimutang sa Ulas ning dakbayan sa Davao aduna sumala pa’y nabati nga boto ang manager sa nahisgutan nga establisamento hinongdan nga iyang gisusi.
Sumala sa guardya nga aksidente niya nga nakablit ang gatilyo sa iyang punto 38 kalibre nga armas ug aksidente nga naigo ang usa ka empleyada nga usa ka Jansing Debarbo, 35 anyos, nga nakahiagum ug samad sa iyang tuo nga tiil ug gidali sa pagdala sa Adventist Hospital alang sa hinanali nga pagpanambal.
Dali sab dayon nga mi-responde ang mga sakop sa Talomo PNP, diin pakyas nga makapresenta sa iyang armas ug lisensya ang guardya. Balhug na karon sa Talomo PNP ang guardya ug posibling mapasaka-an ug kaso.
