DAVAO CITY – Gitino ni Atty. Teresita Yñiguez ang Regional director sa Land Transportation and Regulatory Board (LTFRB) 11 nga wala pa silay nadawat nga kamandoan kung ipatuman na ang pag-phase out sa mga karaan nga unit sa pampasaherong dyip partikular na kadtong milungtad na ug kapin kinse ka tuig pataas.
Apan gipasabot sa opisyal nga kung hingpit na kini nga ipatuman, alang sumala pa kini sa kaayohan sa tanan ilabi na sa mga driver ug pampasahero nga mga sakyanan.
Dugang sa opisyal nga mapatuman lamang ang kamandoan sa higayon nga malagdaan na ang Omnibus franchising code sa kalihim sa Transportation Department ingon man sa chairman sa board.
Nasayran nga mamahimong climate friendly na ang mga Public Unit Jeepney (PUJ) sa umaabot nga panahon gumikan kay gamiton na kadtong mga electronic o upgraded nga mga jeepney nga walay ibuga nga polusyon nga makadaut sa kinaiyahan.
Kahinumduman nga wala nakighiusa ang pipila ka mga Transport group sa gipahigayon nga Nationwide transport strike kagahapong adlawa inay mas gipili nila nga magpahigayon ug caravan ingon man lihok protesta atubangan sa buhatan sa LTFRB aron nga ipasibaw ang ilang mga mulo.
