DAVAO CITY – Grabe nga depresyon ang hinungdan nganong misulay pagkutlo sa iyang kinabuhi ang usa ka peneriso sulod sa San Pedro Police Station.
Gikanayong wala na giduaw sa iyang mga kabanay ang biktima nga si Alvin Almaro, 26, nag-atubang ug kasong carnapping hinungdan nga nakahukom kini nga maghikog gamit ang usa ka wire sa appliances.
Apan dali nga naluwas ang nahisgutan human nga usa sa mga kaubanan niini nga peniriso ang miluwas kaniya. Una na sab nga gibutyag ni Chief Inspector Ramil Macarampat, hepe sa San Pedro Police Station, nga dali gilayon nga miresponde ang Central 911 ambulance ug gitabang si Almaro nga nawad-an sa iyang panimuot.
Gikanayong maayo pa ang biktima dihang gibalhog kini sa presohan apan paglabay sa pipila ka adlaw kanunay na matud pa kini nga maghinuktok nga posibleng hinungdan sa iyang depresyon.
