DAVAO CITY – Hisgutan sa mosunod nga sesyon sa konseho ning siyudad ang truck ban diin giimbitahan sa mga konsehal ang Department of Public Works and Highway aron mahatagan na ug katin-awan ang ilang mga concerns.
Kahinumduman nga ang nahisgutan nga item gipailalom sa ikaduhang pagbasa sa milabay nga sesyon.
Matud pa kang konsehal Conrado Baluran kinahanglan nga hatagan sa mga eksperto gikan sa DPWH regional office ug katin-awan ang pipila ka mga isyu sama sa infrastructure schedules sa ilang proyekto.
Dugang ni Baluran, nga ang City Transport and Traffic Management Office miuyon nga kinahanglan adunay idugang nga oras sa pag-ban sa mga truck ilabi na sa rush hour diin himuon kining 5:00 sa buntag hangtud 9:00 sa buntag alang sa morning rush hours ug 4:00 sa hapon hangtud 7:00 sab gabii gikan sa kasamtangan nga schedule nga anaa sa 7:00 sa buntag hangtud 9:00 sa buntag ug 5:00 sa gabii hangtud 8:00 sa gabii.
Sa nahisgutan nga ordinansa, did-an ang mga truck nga molatas sa mga nag-unang kadalanan sa siyudad gawas lamang sa adlaw nga Sabado, Domingo, ug special ingon man non-working holidays.
Samtang una nang gipasalig sa Davao Alliance of Transport Stakeholders, ingon man sa local ug national government agencies nga motabang sa City council sa pagmugna ug mga sumbanan aron makatabang sa suliran sa paghuot sa dagan sa trapiko sa mga nag-unang kadalanan sa siyudad.
