DAVAO CITY – Plano karon sa lokal nga panggamhanan sa Malita Davao Occidental ang pagdeklara ug State of Calamity human nga daghanang pamilya ang naapektohan sa pag-igo sa hanging amihan niining milabay nga adlaw.
Kahinumduman nga kapin gatus ka mga pamilya nga gikan sa Brgy. Poblacion, Fishing Village ug Kidalapong ang mibakwit ug nagpabilin sa mga evacuation center gumikan kay gihapak ang ilang mga pinuy-anan sa kusog nga mga balud.
Gawas sa nahisgutan nga mga Barangay, apektado sab sa monsoon wave ang mga lugar sa Brgy. Lakaron, New Argao, Tingolo, Mana, Lais, Culaman ug Buhangin.
Una niini, gisuspendi ang klase sa walo ka mga Barangay sa Malita kini human nga nakaangkon ug kadaut ang mga tulonghaan hatud sa hanging amihan.
Gi-andam na sab karon sa lokal nga panggamhanan sa lalawigan sa Malita ang hinabang nga ihatag sa mga bakwit.
