DAVAO CITY – Mikabat ngadto sa usa ka gatus ka libo ka pesos ang namugnang kadaut sa sunog nga gikatuohang electrical short circuit ang nag-una nga hinongdan sa San Francisco St., Buhangin, ning dakbayan sa Davao.
Misugod sa pagsilaob ang sunog kagahapon sa mga alas-12:42 sa hapon.
Sumala pa SFO1 Segundo Dumasig sa Bureau of Fire Protection (BFP) nga naggikan ang sunog sa panimalay sa usa ka Victor Delegiro, 59 anyos.
Gumikan kay gama lamang sa kahoy ang balay paspas ang pagka-ugdaw niini.
Napagan sa sunog ang panimalay sa usa ka Nestro Silangan, 46 anyos, minyo, human nga dali nga mikatag ang kalayo sa dapit.
Sa pasi-una nga imbestigasyon sa BFP nasayran nga wala maghaling ang asawa ni Deligiro nga si Keena ug wala sa’y uban nga nakasak-sak nga mga appliances hinungdan nga gituoohang depektuso nga electrical wiring ang hinungdan sa pag-ulbo sa kalayo.
Dugang pa ni SFO1 Dumasig nga gibana-banan nga mokabat ngadto sa usa ka gatus ka libo ka pesos ang namugnang kadaut sa nahisgutan nga sunog.
Gideklara nga fireout ang dapit mga ala-1:15 kagahapon sa hapon.
