Nakadawat og Emergency Cash Transfer o ECT assistance ang 585 ka pamilya sa Brgy. Molmol, Jose Abad Santos, Davao Occidental nga naapektuhan sa magnitude 7.8 nga linog.
Gihatod sa Department of Social Welfare and Development Field Office XI ang ayuda niadtong Agosto 10 isip kabahin sa early recovery efforts alang sa mga pamilyang naapektuhan sa kalamidad.
Sa kinatibuk-ang benepisyaryo, 366 ka pamilya ang adunay totally damaged nga balay, samtang 219 ka pamilya ang adunay partially damaged nga panimalay.
Nakadawat og P10,244 ang matag pamilya nga totally damaged ang balay, samtang P5,122 ang gihatag sa matag pamilya nga partially damaged ang panimalay.
Tumong sa cash assistance nga makatabang sa mga apektadong pamilya sa ilang adlaw-adlaw nga panginahanglan ug sa pag-ayo o pagtukod pag-usab sa ilang mga balay.
Padayon ang DSWD XI sa paghatag og tabang sa mga komunidad nga naapektuhan sa linog sa Davao Occidental. | VIA BOMBO EROS PAJOTA
