Maghatag og expert legal opinion ang upat ka retired Supreme Court justices kabahin sa gidaghanon sa boto nga gikinahanglan aron ma-convict o ma-acquit si Vice President Sara Duterte sa impeachment trial.
Tulo kanila ang personal nga motambong sa impeachment court sa Septiyembre 16,2026 sila si kanhing Chief Justices Artemio Panganiban ug Renato Puno, ug retired Associate Justice Adolf Azcuna.
Samtang, magsumite og legal memorandum si kanhing Chief Justice Hilario Davide Jr., nga maoy nangulo sa impeachment trial ni kanhing Presidente Joseph Estrada gikan 2000 hangtod 2001.
Nahitabo kini human giapelar ni Senator-Judge Erwin Tulfo ang ruling ni presiding officer Chiz Escudero nga nagkinahanglan og 16 ka boto aron ma-convict ang usa ka impeachable official.
Gikuwestiyon ni Tulfo ang voting threshold tungod sa padayong pagkawala sa upat ka senator-judges nga sila Jinggoy Estrada, Rodante Marcoleta, Bato dela Rosa ug Loren Legarda.
Sa Septiyembre 16, mahimong mangutana ang mga senator-judge sa amici curiae human nila ipresentar ang ilang legal advisories.
Samtang sa Septiyembre 23, adunay tig-15 minutos nga oral arguments ang House prosecution ug defense panel sa dili pa mobotar ang impeachment court ug resolbahon ang isyu sa voting threshold.
