DAVAO CITY – Na-stranded ang mokabat ngadto sa traynta y uno ka mga partisipante sa National Medical and Solidarity Mission sa lungsod sa Talaingod, sa lalawigan sa Davao del Norte kagahapong adlawa human nga ang mga gikatahapan nga mga sakop sa Alamara, usa ka paramilitary group, mibahad sa pagpatay kanila.
Sumala pa kanmg Save Our Schools (SOS) Network spokesperson Rius Valle, nga temporary sila nga nagsaka sa Sitio Nasilaban sa Barangay Palma Gil, samtang nagpa-abot sa security assistance sa local government units (LGUs) sa nahisgutan nga lungsod.
Dugang pa kang Valle nga nakatakda na unta sila nga mobiya sa dapit sa dihang nakadawat sila ug impormasyon nga ang mga motorsiklo nga nakatakda unta nga mokuha kanila gibaharan nga pasakitan sa mga Alamara kung dayonon ang pagtagbo sa mga bisita sa Nasilaban.
Mga biology students ug professors gikan sa University of the Philippines (UP) in Mindanao ang kalakip sa 31 ka mga participante sa nahisgutan nga mission nga nakatakda unta nga mosuta sa hinongdan sa cholera outbreak sa nahisgutan nga lungsod sukad pa sa milabay nga tuig.
Ang mission misugod niadtong Pebrero 9, Hwebes.
Nasayran nga usa ka Joven Salangani ang mihulga sa mga motorcycle drivers nga pasakitan kung tagbuon ang mga bisita.
Dugang pa ni Valle nga si Salangani ang unang gi-akusahan nga nakapatay sa 15-anyos nga usa ka Alibando Tingkas sa milabay nga tuig.
Bisan pa niini Si Philippine Army’s 10th Infantry Division spokesperson Captain Rhyan Batchar, namahayag nga andam sila nga mohatag ug security alang sa mga participants kinsa na-estraded sa dapit kung pormal nga mangayo ug panabang ang grupo.
