Nadakpan sa kapulisan karung adlawg Biyernes Hulyo 17, 2026 sa buntag ang tulo sa upat ka mga suspek nga giingong responsable sa pagpatay kang American marine biologist Dr. Kent Carpenter, sumala sa Philippine National Police (PNP).
Lakip sa mga nadakpan ang giingong mipusil sa biktima, ang suspek nga giakusahang milugos sa live-in partner ni Carpenter, ug ang giingong nagsilbing lookout atol sa krimen.
Nahitabo ang insidente kaniadtong Domingo Hulyo 12, 2026 sa gabii sulod sa balay ni Carpenter sa Barangay Ajong, Sibulan, Negros Oriental.
Subay sa imbestigasyon, nagtan-aw og telebisyon ang 73 anyos nga marine biologist sa dihang pugos nga misulod ang mga suspek sa iyang balay. Usa kanila ang giingong mipusil sa iyang ulo sa wala pa sila mikalagiw.
Gipaila sa kapulisan ang mga nadakpan pinaagi sa ilang mga alyas nga M.O., 26 anyos, nga giingong gunman; J.F., nga giakusahan sa paglugos sa live-in partner sa biktima; ug C.D., nga giingong nagsilbing lookout sa maong krimen.
Padayon pa usab nga gipangita sa kapulisan ang ikaupat nga suspek sa maong krimen.
Si Dr. Kent Carpenter giila isip eksperto sa pagtuon sa coral reefs ug marine biodiversity. Sumala sa mga awtoridad, dako ang iyang natampo nga panukiduki sa kasong gisang-at sa Pilipinas nga mitultol sa 2016 arbitral ruling kalabot sa West Philippine Sea.
