Giduso ni Senator Erwin Tulfo ang 20% discount sa mobile load ug internet services alang sa mga estudyanteng Pilipino aron makatabang sa mga pamilyang naglisod sa pagpondo sa online learning.
Ubos sa Senate Bill No. 2275 o Student Load Discount Act nga gi-file ni Tulfo, sakop sa discount ang mobile prepaid load, mobile postpaid plans ug mobile internet packages.
Tumong sa maong sugyot nga maminusan ang dugang gasto sa mga estudyante ug ilang mga ginikanan, ilabina karon nga kasagarang mapugos ang mga eskwelahan sa pagbalhin sa online classes tungod sa dili maayong panahon.
Matud ni Tulfo, dili na igo ang karaang konsepto sa class suspension nga nagpasabot nga walay klase, tungod kay daghang eskwelahan karon ang naggamit og online learning aron malikayan ang pagkabalda sa pagtuon.
Sakop sa sugyot ang mga Pilipinong naka-enroll sa elementarya, sekondarya, technical-vocational ug higher education, gawas sa post-graduate studies.
Magamit ang 20% discount sa tibuok tuig, apil ang weekends ug holidays.
Kinahanglan lamang magpakita ang mga estudyante og school ID o proof of enrollment ug birth certificate aron makabenepisyo niini.
Obligado usab ang mga kompanya sa telecommunications nga ipatuman ang discount alang sa mga kwalipikadong estudyante, samtang adunay silot alang sa mga molapas sa balaod.
Giinsistir ni Tulfo nga dili angay mahimong babag sa pag-eskwela ang kakulang sa ikapalit og mobile data o internet sa usa ka estudyante.
| via Bombo Ray Ann Martinez
