Makadawat og tag-₱100,000 nga pinansyal nga ayuda ang duha ka miyembro sa Philippine Navy nga naangol sa insidente sa Ayungin Shoal. Matud sa Malacañang, ang maong ayuda usa ka pag-ila sa sakripisyo ug dedikasyon sa mga sundalo nga nasamdan samtang nagtuman sa ilang katungdanan sa gilalisang bahin sa West Philippine Sea.
Wala pa gipadayag sa Malacañang ang pagkaila sa duha ka Philippine Navy personnel ug ang detalye sa ilang mga samad. Apan, gipasalig sa gobyerno nga padayon silang makadawat sa gikinahanglang suporta samtang nagpaayo.
Gipagawas sa Armed Forces of the Philippines (AFP) ang usa ka bidyo nga nagpakita sa mga personnel sa Philippine Navy sakay sa mga rubber boat nga gipadala gikan sa BRP Sierra Madre atol sa usa ka legal ug dili komprontasyonal nga operasyon kaniadtong Hulyo 20, 2026, aron pahawaon ang usa ka China Coast Guard (CCG) rigid hull inflatable boat (RHIB) nga, sumala sa AFP, miduol nga walay katungod sa palibot sa outpost sa Ayungin Shoal, sulod sa katubigan diin ang Pilipinas adunay soberanong katungod ubos sa internasyonal nga balaod.
Gikanayon sa AFP nga mitubag ang China Coast Guard pinaagi sa pagbunal sa mga personnel sa Philippine Navy gamit ang mga baton ug pagguba sa ilang mga rubber boat. Matod pa sa militar, nagpakita ang mga sundalong Pilipino og labing taas nga pagpugong sa kaugalingon, propesyonalismo, ug disiplina bisan pa sa ilang giatubang nga agresyon. Apan, gilimod sa CCG ang moang alegasyon ug giingong ang mga personahe sa Pilipinas maoy unang migamit og mga bugsay isip armas aron bunalan ang ilang mga personahe.
Padayon usab nga gimonitor sa mga ahensya ang sitwasyon sa maong lugar samtang nagpadayon ang mga lakang sa gobyerno aron masiguro ang kaluwasan sa mga personnel sa AFP nga naka-deploy sa West Philippine Sea.
