Malampusong nahuman sa Philippine Coast Guard (PCG) ug Bureau of Fisheries and Aquatic Resources (BFAR) ang fuel subsidy mission alang sa mga Pilipinong mangingisda sa Bajo de Masinloc o Scarborough Shoal kagahapong adlawa, Hulyo 23, bisan pa sa giingong delikadong pagharas ug pagpabuto og water cannon sa China Coast Guard (CCG).
Sumala pa ni PCG spokesperson for the West Philippine Sea Rear Admiral Jay Tarriela, misuway og duol ang barko sa China Coast Guard nga CCG 3302 sa BRP Datu Dumangsil nga adunay gilay-on nga mga 50 metros sa atubangan sa barko sa Pilipinas alas-5:54 sa buntag. Dugang pa niini, giingong gipadul-an og water cannon sa CCG 3302 ang BRP Datu Dumangsil alas-6:29 sa buntag sulod sa kapin duha ka minuto.
Lakip usab sa insidente ang peligrosong pagduol sa CCG 21579 ngadto sa BRP Datu Paiburong sa gilay-on nga mga 500 metros samtang nagpadayon ang operasyon sa mga Pilipino. Gibutyag usab ni Tarriela nga nakadawat og radio challenge gikan sa pwersa sa China ang PCG Cessna Grand Caravan samtang nagpahigayon kini og maritime domain awareness flight sa maong lugar.
Hinuon, gipamatud-an sa opisyal nga walay natalang nasamdan sa panig sa mga Pilipino ug malampusong nahatag sa M/V Mamalakaya ug BRP Datu Cabaylo ang suplay sa krudo ug food packs ngadto sa mga bangkang pangisda sa mga Pilipino. Sa kasamtangan, nagpadayon ang BRP Datu Sumakwel sa iyang patrol ug resupply operations sa West Philippine Sea.
