Gibutyag sa state weather forecast Leanne Loreto, nga gibanabana nga adunay usa hangtod duha ka tropical cyclone ang posibleng maugmad o mosulod sa Philippine Area of Responsibility (PAR) karong Mayo. Sumala pa sa weather bureau, kasagaran sa mga bagyo sa Mayo nagre-recurve o moliko sa direksyon, busa dili kini direktang moigo sa nasud.
Lakip sa gihisgutan, gilauman nga ang sunod nga mga ngalan sa bagyo karong tuiga mao ang “Caloy” ug “Domeng” kung adunay maugmad nga bagyo. Dugang pa niini, nagpasidaan ang ahensya nga magpadayon hangtod sa unang bahin sa Mayo ang init ug uga nga panahon sa tibuok nasud.
Sa kasamtangan, posibleng moabot sa 40.8°C ang kainit sa Northern Luzon, 40°C sa Central Luzon, ug 38.1°C sa Metro Manila. Sumala pa sa forecast, adunay 20 hangtod 40 porsyento nga kakulangan sa ulan sa Metro Manila ug pipila ka bahin sa Northern ug Central Luzon, samtang mas taas sa normal ang ulan sa pipila ka lugar sa Visayas ug Mindanao.
Dugang pa niini, nagpagawas na og El Niño alert ang weather bureau tungod sa hapit 80 porsyento nga tsansa nga maugmad kini gikan Hunyo hangtod Agosto, ug posible pang mas sayo sa Mayo hangtod Hulyo. Sa pagkakaron, giingon sa ahensya nga posibleng moubos ang gidaghanon sa bagyo apan mahimong mas kusgan ang matag maugmad, samtang gilauman nga molungtad pa ang El Niño hangtod sa unang bahin sa 2027.
