Sikop sa mga operatiba sa Bureau of Immigration (BI) ang 10 ka langyaw atol sa usa ka operasyon sa General Luna, Surigao del Norte, lakip ang upat ka Israeli. Sumala pa sa BI, nasikop ang mga langyaw tungod sa giingong paglapas sa mga balaod sa Immigration, lakip ang pagka-undesirable, paglapas sa gitugot nga panahon sa pagpuyo sa nasod o overstaying, ug pagtrabaho nga walay tukmang permit.
Dugang pa niini, gawas sa upat ka Israeli, lakip usab sa mga nadakpan ang duha ka Chinese, usa ka Lithuanian, usa ka Australian, usa ka Moroccan, ug usa ka Nigerian. Sa kasamtangan, anaa sila sa temporaryong kustodiya sa General Luna Municipal Police Station samtang gihulat ang ilang pagbalhin ngadto sa Immigration detention facility. Lakip sa ginaproseso sa Bureau of Immigration, ang pagsang-at sa mga kasong may kalabotan sa Immigration ug ang pagpadayon sa deportation proceedings batok sa mga nadakpan.
Sa pagkakaron, nagpadayon ang imbestigasyon sa BI aron masuta ang posibleng dugang pang mga paglapas sa mga langyaw nga nalambigit sa maong operasyon.
