Gipunting sa Office of the Ombudsman nga walay lugar ang kulturang “utang na loob” sa mga opisyal ug pampublikong opisina, ug mas labaw ang responsibilidad sa katawhan kaysa pagtan-aw og utang na loob sa bisan kinsang donor sa usa ka opisyal.
Bisan pa niini, giila sa Ombudsman nga kabahin sa kulturang Pilipino ang utang na loob, ilabina sa pamilya, higala, ug mga kaila isip pamaagi sa pagpasalamat.
Gihisgutan kini human pormal nga gikasohan sa Ombudsman si Senador Rodante Marcoleta, former Anakalusugan Party-list Rep. Mike Defensor, ug uban pang indibidwal.
Nag-atubang sila og kasong plunder ug paglapas sa Presidential Decree No. 46, nga nagdili sa mga opisyal sa gobyerno sa pagdawat og mga regalo.
Sumala sa Ombudsman, ang mga kaso mitumaw human giangkon ni Marcoleta ang pagdawat sa giingong campaign donations. Ang depensa sa senador nga adunay siya’y utang na loob sa giingong ₱75 milyon nga donasyon, mao mismo ang usa sa mga rason nganong gipatuman ang mga kasong plunder ug bribery batok kaniya.
Busa, bisan pa sa mga rally sa iyang mga supporters, lakip ang mga miyembro sa Iglesia Ni Cristo (INC), gipadayon gihapon sa Ombudsman ang pagsaka sa maong mga kaso.
Sa miaging pahayag ni Marcoleta atol sa usa sa mga rally, iyang giingon nga andam siyang magpakulong ug wala siyay problema kon mao kini ang “kabayaran” sa iyang giingong pagpanalipod sa hustisya ug interes sa mga Pilipino.
Human sa pormal nga pagsampa sa kaso, gipaabot karon ang sunod nga lakang sa Sandiganbayan, lakip ang posibilidad sa pagpagawas og warrant of arrest batok sa senador.
