Usa ka banana plantation sa Davao De Oro, gipabuthan og granada

DAVAO CITY – Gipabuthan og granada sa wa mailhing mga suspetsado ang usa ka planta sa saging sa Purok 18 Barangay Tagnanan sa Mabini sa Davao De Oro, Alas 9 kagahapon, Agosto 24 ning tuig kasamtangan.

Matud pa ni Police Staff Sergeant Benjie Cuanan, investigator sa Mabini Municipal Police Station, land dispute tali sa duha ka mga kooperatiba nga TCBC ug SATAGBAGCO ang hinungdan sa pagbusikad.

Dugang pa, miresponde ang mga guwardiya tungod iligal nga nag harvest og saging sa TCBC Banana Plantation ang laing grupo.

Apan, kalit nga gilabay sa mga suspetsado ang granada sa lugar ug natunong kini sa kanal hinungdan way naangol. Padayon ang imbestigasyon sa kapulisan ug giandam na sab ang kaso nga ipasang-at sa mga responsable sa pagbusikad.