Nagkasinabot na ang Estados Unidos ug Iran alang sa kasabutan aron tapuson ang ilahang gubat ug magpahigayon og opisyal nga seremonya sa pagpirma karong Biyernes sa Switzerland, sumala sa gipahibalo sa Punong Ministro sa Pakistan nga si Shehbaz Sharif sa social media karonmg adlawa.
Nahimo ang maong kasabutan bisan pa sa pag-atake sa Israel sa Lebanon kagahpong adlawa, nga nakadawat og pagsaway gikan sa Iran ug kang Trump.
Wala pa dayon gipadayag ang eksaktong mga kondisyon sa kasabutan.
Matod ni Sharif, ang kasabutan naglakip sa gilayon ug permanente nga pag-undayong sa mga operasyong militar sa tanang dapit, lakip na sa Lebanon.
Sumala sa mga tinubdan, ang draft nga kasabutan mag-abri pag-usab sa Strait of Hormuz, mopahunong sa blockade sa US sa mga pantalan sa Iran, ug mopalugway sa ceasefire, samtang ang isyu sa programa nga nukleyar sa Iran hisgutan pa sulod sa 60 ka adlaw nga dugang negosasyon.
Sa iyang post sa social media, gibutyag ni Trump nga ang strait mahimong abri ug walay bayad sa pag-agi ug tapuson usab ang naval blockade sa US.
Samtang sa laing bahin, gibutyag sa Israel nga dili sila kabahin sa giplanong kasabutan tali sa US ug Iran. Sumala ni Prime Minister Benjamin Netanyahu adunay kalainan sa baruganan kang Trump mahitungod sa hangyo sa Amerika nga pugngan sa Israel ang ilang operasyong militar sa Lebanon aron mapadali ang kasabutan uban sa Iran.
Kahinumduman nga ang panagbangi tali sa Israel ug sa Hezbollah sa Lebanon misamot pag-usab human sa pagsugod sa gubat tali sa US, Israel, ug Iran niadtong Pebrero.
Usa ka taas nga opisyal sa Iran mibutyag nga ubos sa draft nga kasabutan, motugot ang Estados Unidos sa pagpagawas sa $25 bilyon nga nakapugong nga assets sa Iran, samtang ang Iran motugot nga dili maghimo o mangangkon og armas nukleyar.
Miuyon usab ang Iran nga dili magpadayon sa uranium enrichment o magpalapad sa ilang mga pasilidad nukleyar hangtod makab-ot ang pinal nga kasabutan.
