Gikumpirma ni Ukraine President Volodymyr Zelensky nga giatake sa militar sa Ukraine ang duha ka oil refinery sa Russia atol sa ilang pinakabag-ong opensiba.
Sumala sa online post ni Zelensky, naapil sa ilang gitarget ang Slavneft-Yanos Refinery sa Yaroslavl ug ang Bashneft-Novoil Refinery sa Bashkortostan.
Dugang pa niini, giingon sa Ukrainian president nga gi-atake usab sa ilang pwersa ang duha ka military patrol boats ug mga barko nga kabahin sa gitawag nga shadow fleet sa Russia sa Black Sea.
Sa laing bahin, giingon ni Yaroslavl Governor Mikhail Evraev nga napukan sa ilang depensa ang mga Ukrainian drone nga misulay og pag-atake sa rehiyon.
Apan, sumala pa kaniya, ang mga debris gikan sa nahagsa nga drone maoy hinungdan sa sunog sa tulo ka kabalayan.
Sa kasamtangan, gikumpirma sa gobernador nga upat ka mga tawo ang nasamdan tungod sa shrapnel, apan walay natalang namatay sa maong insidente.
