Gikontra ni Philippine Coast Guard (PCG) spokesperson alang sa West Philippine Sea (WPS) Rear Admiral Jay Tarriela ang mga pasangil sa China nga nanghilabot o “infringement” kuno ang mga personnel sa Philippine Navy sa Ayungin Shoal. Gihimo ni Tarriela ang maong pahayag human sa laing tensiyon tali sa mga tropang Pilipino nga nagdumala sa BRP Sierra Madre ug sa China Coast Guard niadtong Lunes, Hulyo 20.
Sumala pa kang Tarriela, walay nahimong paglapas ang Pilipinas sa maong insidente, hinunoa, iyang giinsistir nga ang mga tropang Pilipino nagpahigayon lamang sa ilang katungdanan sulod sa kaugalingong katubigan sa nasod. Dugang pa niini, giakusahan ni Tarriela ang China Coast Guard nga maoy nanghilabot sulod sa Exclusive Economic Zone o EEZ sa Pilipinas, samtang gibutyag niya nga ang Ayungin Shoal kabahin sa katubigan sa nasod pinasikad sa 2016 Arbitral Award ubos sa United Nations Convention on the Law of the Sea o UNCLOS.
Matud pa ni Tarriela, walay legal nga basihan ang pag-angkon sa China sa maong lugar, lakip na ang ilang nine-dash line claim. Gisaysay usab sa opisyal nga usa ka sakayan sa China Coast Guard nga adunay walo ka personnel ang miduol sa BRP Sierra Madre ug misulay og dili otorisadong inspeksiyon, hinungdan sa komprontasyon tali sa duha ka panig.
Giingon ni Tarriela nga usa ka Chinese crew member ang miigo gamit ang kahoy nga baton sa usa ka sundalong Pilipino, nga miresulta sa samad ug kadaot sa rubber boat sa Pilipinas. Sa pagkakaron, nagpabilin ang tensiyon sa maong bahin sa West Philippine Sea samtang gipadayon sa Pilipinas ang pagdepensa sa iyang katungod sulod sa kaugalingong katubigan. Kahinumduman nga nahitabo ang insidente sulod sa EEZ sa Pilipinas nga kapin sa 600 nautical miles ang gilay-on gikan sa Hainan Island sa China.
