Gisuspendi usab ang tanang byahe sa mga barko o sakayanang pandagat, bisan unsa pa ang gidak-on, lakip na ang pagpanagat ilabi na sa mga lugar nga sakop sa dakbayan sa Davao kini subay sa kamanduan gikan sa Coast Guard Davao.
Ang nasampit nga kamanduan ang nahisubay sa impormasyon gikan sa Philippine Institute of Volcanology and Seismology (PHIVOLCS-DOST), ug base sa giusab nga kalkulasyon sa kusog sa linog ug tsunami wave models sa Pacific Tsunami Warning Center, gilauman nga makasinati ang mga baybayong dapit sa Pilipinas nga nag-atubang sa Pacific Ocean og mga balud nga adunay katas-on nga ubos sa usa (1) ka metro.
Tungod niini, gipahimangnuan usab ang mga Kapitan o Operators sa gagmay nga sakayang pangdagat nga magbantay ug mag-andam sa mga posibleng kadaot, ug magpadayon sa pagmando ug pag-monitor sa forecast nga ipagula sa PHIVOLCS-DOST.
Dugang pa niini, ginapasidan-an usab ang tanang residente ug turista nga likayan ang pagpaduol sa baybayon ug gidili ang pagpahigayon og bisan unsang kalihokan sa dagat aron malikayan ang katalagman sa kadagatan ug alang sa kasigurohan sa tanan.
