DAVAO CITY- Nakaangkon ug damyos ang mga sakyanan nga nalambigit sa nahitabong karambola kaganihang buntag.
Subay sa report sa kapulisan, nalambigit nga mga sakyanan atol sa panghitabo mao ang Pick-up type nga multicab, usa ka truck ug SUV.
Samtang atol sa panghitabo adunay usa ka pasahero nga naangol nga si Thiela Villanueva, 35 anyos nga nga nagpuyo sa Small Village, Mintal ning syudad.
Subay sa report sa traffic section sa Baliok PNP, usa ka multicab nga pick-up type ang nagsubay sa Davao Bukidnon Highway sa inner lane diin, sakay ang biktima ug gimaneho sa usa ka Wenino Tan, 34-anyos nga niadtong tungura padulong kini sa Ulas ning dakbayan.
Niadtong tungura usab nakadungan niini ang usa ka truck nga nagsubay sa inner lane nga gimaneho sa usa ka Edgardo Alforque, 68 anyos.
Apan kalit lamang nga gikasugat ang usa ka SUV nga gimaneho sa usa ka Nestle Salazar nga nisubay sa lane sa Multicab ug truck nga maoy hinungdan nga nagkarambola ang mga nahisgutan.
Wala na makatamak sa preno ang drayber sa multicab ug dump truck nga hinungdan usab sa kusog nga pagkabangga niini. Nasayran nga padulong sa Mintal ang SUV atol sa maong panghitabo.
Samtang ang pasahero nga sakay sa multicab ang daling gidala sa Southern Philippines Medical Center.
Samtang atol sa maong panghitabo, nakamugna sab ug bug-at nga dagan sa trapiko ang nahitabong karambola sa mga sakyanan.
