Gibatikos ni Senador Imee Marcos ang ikalimang State of the Nation Address (SONA) sa iyang igsoon nga si Pangulong Ferdinand “Bongbong” Marcos Jr., ilabina ang pahayag niini nga posibleng pasakaan og kaso sa Office of the Ombudsman ang ilang ig-agaw nga si kanhi House Speaker Martin Romualdez.
Sumala pa ni Sen. Imee Marcos, iyang gihulagway nga usa lamang ka “pambubudol” ang maong pahayag sa Pangulo. Dugang pa, gikuwestiyon niini ang giingon niyang kalainan sa pagpatuman sa hustisya, diin paspas makasuhan ang mga opisyal nga kritikal sa administrasyon, apan dugay ang aksyon batok sa mga kaalyado niini.
Lakip sa iyang gibutyag nga dili lamang si Romualdez ang angayng manubag sa giingong mga isyu, tungod kay, matud pa niya, dili kini nag-inusara sa maong mga transaksiyon. Sa kasamtangan, wala motambong si Senador Imee Marcos sa SONA, uban sa ubang mga miyembro sa minorya sa Senado. Samtang, positibo usab ang reaksyon ni Senador Robin Padilla sa maong pakigpulong sa Pangulo.
Matud pa ni Padilla, iyang gipasalamatan ang Pangulo tungod sa mas daghang paggamit sa wikang Filipino sa iyang SONA nga, sumala kaniya, nakatabang aron mas masabtan sa ordinaryong mga Pilipino ang mga plano sa administrasyon alang sa nahibiling bahin sa termino niini.
Kahinumduman, usa sa mga pahayag ni Pangulong Marcos sa iyang SONA ang kampanya batok sa korapsyon ug ang padayon nga pagpasaka og mga kaso batok sa mga opisyal ug indibidwal nga giingong nalambigit sa mga iregularidad sa mga proyekto sa gobyerno.
