Gihagit ni Senador Alan Peter Cayetano si Senador Panfilo “Ping” Lacson ug ang publiko nga mobisita sa Taguig City aron personal nga masusi ang mga infrastructure projects ug mapamatud-an nga walay nahitabong anomalya. Sumala pa ni Cayetano, ang mga alegasyon nga adunay iregularidad sa mga proyekto sa siyudad gibase lamang sa daan o giingong recycled nga mga litrato sa billing ug collection records.
Dugang pa niini, gisalikway sa senador ang mga pasangil nga iyang gikontrolar pinaagi sa “virtual” ang operasyon sa Department of Public Works and Highways (DPWH) sa Taguig. Lakip sa iyang gipahayag pinaagi sa social media nga andam niyang tubagon ang tanang alegasyon batok kaniya, ug nagtuo siyang ang aktuwal nga kahimtang sa mga proyekto sa siyudad maoy mopamatuod sa ilang baruganan.
Matud pa ni Cayetano, kon personal nga mobisita si Lacson ug ang publiko sa Taguig, makita nila ang tinuod nga kahimtang sa mga proyekto ug matino kon adunay basehan ang mga dokumento ug litrato nga gipasikad sa mga alegasyon. Kahinumduman nga una nang giakusahan ni Lacson nga adunay mga iregularidad sa pipila ka infrastructure projects sa Taguig.
Lakip sa iyang gihisgutan ang giingong double appropriations alang sa parehas nga proyekto ug overlapping spans sa slope protection projects nga nagkantidad og minilyon ka piso, base sa lima ka case studies nga giandam sa iyang mga kawani. Sa pagkakaron, wala pa mopagawas og dugang pahayag ang kampo ni Lacson isip tubag sa hagit ni Cayetano.
