Misuporta si Batangas 2nd District Rep. Gerville Luistro sa posibilidad nga maablihan sa media ug publiko ang mga umaabot nga pre-trial conference sa impeachment case batok kang VP Sara Duterte.
Kahinumduman nga wala tugoti ang media sa bug-os nga coverage sa unang pre-trial conference, ug pipila lamang ka bahin sa sesyon sama sa roll call sa mga abogado ang gitugotan nga masubay sa mamamahayag.
Apan sumala pa ni Rep. Luistro, kinahanglan usab masabtan sa publiko ang mga konsiderasyon sa impeachment court nganong wala kini bug-os nga giablihan sa mga tigbalita ug sa katawhan.
Dugang pa niini, iyang gipatin-aw nga masusi, balik-balik ug taas nga proseso ang pre-trial conference ilabina sa pagmarka ug pagrepaso sa mga ebidensya nga ipresentar sa duha ka kampo.
Subay sa iyang pahayag, ipagawas ra gihapon sa impeachment court ang mga nasabotan ug mahisgutan sa sunod nga mga conference pinaagi sa pre-trial order o report human mahuman ang serye sa mga miting.
