Gilauman nga makasinati og dakong pagkunhod sa presyo sa gasolina ug diesel ang mga motorista sa sunod nga semana.
Base sa giingong pagtuki sa usa ka oil industry source gamit ang Mean of Platts Singapore o MOPS trading ug foreign exchange averages sa milabay nga upat ka adlaw, gibanabana nga mokabat sa:
₱4.50 hangtod ₱5.00 kada litro ang posibleng pagkunhod sa presyo sa diesel, samtang ₱4.50 hangtod ₱5.00 kada litro usab sa gasolina
Sumala sa source, miubos ang presyo sa lana sa merkado tungod sa paglaum nga adunay diplomatic breakthrough sa panagbangi tali sa Estados Unidos ug Iran, nga nakapakunhod sa geopolitical risk premium.
Dugang pa niini, miubos usab ang presyo sa fuel products tungod sa pagkunhod sa presyo sa krudo, diin naapektuhan ang Asian diesel ug gasoline prices.
Kasagarang ipahibalo sa mga kompanya sa lana ang ilang price adjustment matag Lunes, nga ipatuman sa sunod nga adlaw, Martes.
Kahinomduman nga niining semanaha, sugod Agosto 4, 2026 gipaubos sa mga kompanya sa lana ang presyo sa gasolina og ₱0.73 kada litro, diesel og ₱0.60 kada litro, ug kerosene og ₱2.09 kada litro.
Nakatabang usab ang paglig-on sa peso batok sa dolyar sa pagpaubos sa presyo sa produktong petrolyo sa lokal nga merkado.
