Gitambungan ni Commanding General sa Philippine Army nga si Lieutenant General Antonio Nafarrete ang gipahigayon nga pagbendisyon ug ang inagurasyon sa mga importanteng pasilidad ug usa ka mobility asset sa Camp General Manuel T. Yan Sr. sa Brgy. Tuboran, Mawab, Davao de Oro kagahapong adlawa( Abril 28, 2026).
Sa maong okasyon, gihatagan usab ni Lt. Gen. Nafarrete ang Army Governance Pathway (AGP) Institutionalized Status sa 10th Infantry (Agila) Division (10ID), isip pag-ila sa ilang padayon nga kahusayan sa sistema sa pagdumala, proseso, ug institusyonal nga performance.
Ang kalihokan nga gi-host sa 10ID naglakip sa ribbon-cutting ug pag-abli sa pipila ka bag-ong pasilidad sama sa 10ID Warehouse (Maintenance Facility) ug mga pasilidad sa 10th Division Training School (10DTS).
Apil niini ang concrete road, Mentor’s Arch, obstacle ug rope course, DTS tower ug bleacher, Kaakibat Hall, administrative building ug library, ug mga classroom.
Usa usab ka coaster bus ang gipabindisyon aron mapalambo ang transportasyon sa mga tropa.
Gibutyag ni Major General Alvin Luzon, Commander sa 10ID, nga ang bag-ong mga pasilidad nagpakita sa padayon nga paningkamot sa dibisyon sa pagpalig-on sa operational support systems, pagpaayo sa kaayuhan sa mga sundalo, ug pagpalig-on sa ilang katakus sa pagtubag sa internal security ug external defense requirements.
Sa iyang pakig-istorya sa mga tropa, gibutyag ni Lt. Gen. Nafarrete nga ang maong mga pasilidad dili lang materyal nga kahimtang, kondili simbolo usab kini sa ilang dedikasyon sa pagpalambo sa operational efficiency ug pagseguro sa kaluwasan, kahapsay sa lihok, ug kaayohan sa mga sundalo.
Ang maong inisyatibo kabahin sa padayon nga modernisasyon ug capability development sa Philippine Army aron mapadayon ang kalampusan sa internal security operations ug mapalig-on ang depensa sa nasud.
Gipasalig sa 10th Infantry Division nga magpadayon sa iyang misyon sa pagpanalipod sa komunidad, pagsuporta sa kalamboan, ug pagmintina sa kalinaw ug kalig-on sa Southeastern Mindanao.
