Lakip ang Pilipinas sa 95 ka nasod nga mipirma sa usa ka international declaration nga nagtinguhang tapuson ang global nga plastic pollution.
Gihinganlan kining declaration nga “Nice Call for an Ambitious Treaty on Plastic Pollution,” nga gilansad niadtong Hunyo 10 sa ikaduhang adlaw sa United Nations Ocean Conference sa Nice, France.
Tumong sa dokumento ang pagtakda og “global target” aron mapakunhod ang produksyon ug paggamit sa pangunang mga plastic polymers.
Lakip usab niini ang pagpangayo og obligasyon sa mga kaalyadong nasod aron hinay-hinayan nga tanggalon ang mga problema sa plastic products ug chemicals, ingon man ang pagpahapsay sa disenyo sa mga plastik aron maminusan ang epekto niini sa kalikupan.
Kahinumduman nga niadtong Marso 2022, mipasar ang United Nations Environment Assembly og resolusyon alang sa usa ka global treaty nga motubag sa tibuok lifecycle sa plastik.
Lakip sa mga nagsuporta nga nasod ang Pilipinas ug ubang mga nasod gikan sa lain-laing kontinente, nga nagpakita sa komon nga tinguha sa pagbatok sa polusyon sa plastik sa tibuok kalibutan.
