Nanawagan ang Philippine Society for Developmental and Behavioral Pediatrics sa mga ginikanan ug guardian nga hugot nga bantayan ang paggamit sa ilang mga anak sa social media aron mapanalipdan sila batok sa posibleng mga peligro sa online.
Sumala sa grupo, gisuportahan nila ang rekomendasyon sa Philippine Pediatric Society nga ang mga batang nag-edad og 16 anyos paubos dili angay tugotan nga mogamit og social media nga walay pagdumala sa mga hamtong.
Dugang pa niini, gipasiugda nga ang walay pagbantay nga paggamit sa social media mahimong magbutang sa mga bata sa risgo sa makadaot nga online content nga posibleng makaapekto sa ilang panghunahuna, pamatasan ug kinatibuk-ang paglambo.
Sa kasamtangan, giawhag sa grupo ang mga ginikanan nga aktibong giya ug bantayan ang online activities sa ilang mga anak aron masiguro ang ilang kaluwasan sa digital nga kalibotan.
