Gilauman nga magpadala ang Pentagon og dugang libuan ka mga sundalo gikan sa elite 82nd Airborne Division padulong sa Middle East, sumala sa mga report, samtang nagpadayon ang tensyon ug panagbangi tali sa United States ug Iran.
Matud sa mga tinubdan, anaa sa 3,000 hangtod 4,000 ka mga sundalo ang posibleng i-deploy aron mapalig-on ang presensya sa Amerika sa maong rehiyon, bisan pa og gibutyag ni US Pres. Donald Trump nga abri siya sa negosasyon alang sa ceasefire.
Sa karon, wala pa’y klarong petsa kung asa ang eksaktong lugar ipadala ang mga tropa, apan gikabutyag nga kabahin kini sa pagpalapad sa operational capability sa U.S. alang sa posibleng military operations.
Sa pagkakaron, gibanabanaan nga moabot na sa 50,000 ang tropang Amerikano nga anaa sa Middle East.Una na usab nagpadala ang U.S. og dugang pwersa, lakip ang mga Marines ug mga barkong panggubat sama sa USS Boxer.
Bisan paman niini, nagpadayon ang opensiba sa U.S. diin gibutyag nga nakaigo na sa liboan ka mga target sulod sa Iran.
Sa labing bag-ong datos, 13 ka mga sundalong Amerikano ang nakabsan sa kinabuhi ug dul-an 300 ang nasamdan.
Samtang, padayon usab nga giatubang sa administrasyon ni Trump ang ubos nga suporta gikan sa publiko kabahin sa kampanya batok sa Iran, subay kini sa survey nga nagpakita nga mas daghan ang mosupak kaysa mosuporta sa maong aksyong militar.
