Gipahibalo sa Philippine Coast Guard (PCG) nga usa palang ka survivor ang nakaplagan gikan sa naunlod ug na-missing nga Motorized Banca (MBCA) Amejara.
Giklaro ni Capt. Noemi Cayabyab, tigpamaba sa ahensya nga bisan adunay mga reports nga nagsulti nga adunay laing nakit-an nga survivor gawas ni Christopher Bulig, wala pa kini nakumpirma ug ginahimo ang maampingong pag-validate sa impormasyon, ilabi na kay kinabuhi ang nakataya. Ang PCG nagpahimangno sa publiko nga likayan ang pagsangkap sa dili tinuod nga impormasyon aron dili makaguba sa operasyon ug sa moral sa pamilya sa mga apektado.
Padayon gihapon ang Search and Rescue (SAR) operations, kauban ang mga partner government agencies, aron mapadayon ang pagpangita sa mga missing persons, labi na sa ubos nga bahin sa Davao Occidental. Matod ni Capt. Cayabyab, gi-deploy ang aerial ug surface search units, lakip ang 15 ka assets nga naglangkob sa mga vessels, small boats, ug aircraft aron masiguro nga masakop ang tanan nga posibleng lugar nga nahimutangan sa mga nawagtang.
Ang operasyon nagpabilin nga alert ug coordinated, samtang gi-monitor ang kondisyon sa dagat ug panahon aron masiguro ang kaluwasan sa mga rescuers ug survival chances sa mga posibleng nakaluwas. Ang PCG nanawagan usab sa publiko nga magsunod sa official updates lamang ug suportahan ang operasyon pinaagi sa paglikay sa pagpakalat sa sayop nga impormasyon.
