Gikalipay ni Pangulong Ferdinand Marcos Jr. ang pagsugod sa public consultation sa Kamara kalabot sa gisugyot nga Anti-Political Dynasty Bill.
Sumala kang Palace Press Officer ug PCO Usec. Claire Castro, gisuportahan sa Presidente ang maong lakang ilabi na kay apil kini sa mga priority measures nga gitakda sa Punong Ehekutibo.
Matod ni Castro, gusto sa Pangulo nga maduso ngadto sa balaod ang maong sugyot tungod kay kini usab ang tinguha sa daghang mga katawhan.
Samtang, kalabot sa posibilidad nga sertipikahan isip urgent bill ang sugyot balaudnon, gibutyag ni Castro nga hulaton una sa Presidente ang pinal nga bersyon gikan sa duha ka balay balauranan sa Kongreso.
Nakabase, matod pa niya, sa mahimong mga probisyon sa maong sugyot ang desisyon kung kini pirmahan isip urgent. Kagahapon, gipahigayon sa House Committee on Suffrage and Electoral Reforms ubos sa pagpangulo ni Zia Alonto Adiong ang public consultation sa Carmona, diin nabahin ang mga panglantaw, ilabi na sa kabatan-onan nga pabor sa Anti-Political Dynasty Bill.
